या सर्व परिस्थितीत स्पर्धा परीक्षा आणि समांतर शिक्षणाचे काही टप्पे पूर्ण करत होतो, तर काहीवेळा अडकून पडत होतो. पण लिखाण सुरू राहिले, कारण लिखाण हा नेहमी आनंद अनुभवाचा मार्ग राहिला आहे. विशेषतः स्पर्धा परीक्षा आणि राज्यशास्त्र आणि आंतरराष्ट्रीय संबंध या विषयांच्या अभ्यास कक्षेच्या बाहेर जाऊन मुक्तछंद लिखाण करणे नेहमीच आनंददायी राहिले आहे. आता शैक्षणिक दृष्ट्या पीएचडी सुरू असतांना, आपण आपल्या ब्लॉगला वेबसाईटचे स्वरुप द्यावे हा विचार मनात आला. याला आणखी एक कारण ठरली मी सुरु केलेली, www.upscinmarathi.com ही वेबसाईट.

UPSCinMarathi च्या माध्यमातून UPSC आणि MPSC साठी आम्ही मराठी भाषेत अभ्यास साहित्य बनवत आहोत. पण तिथे परत अभ्यासक्रम आणि परीक्षेची गरज याची एक मर्यादा आहे. त्यामुळे मुक्तछंद लिखाणासाठी दुसरा मार्ग निवडणे आवश्यक होते. त्यातूनच निर्माण झाली आपली ही www.mauliwrites.com वेबसाईट.

आता आपले लिखाण खरंच वेबसाईट स्वरुपात प्रस्तुत करावे, अगदी या गुणवत्तेचे आहे का? असा प्रश्न होताच. अर्थात आपण खूप काही अनोखे लिहीत आहोत आणि वाचणार्‍यांना त्याचा खूप काही फायदा होणार आहे, असा वेबसाईट बनवण्याच्या मागचा अविर्भाव अजिबात नाहिये. मला लिखाणाने आनंद मिळतो आणि त्या लिखाणाचे साधन म्हणून ही वेबसाईट आहे, एवढाच उद्देश मी डोळ्यासमोर ठेवून ही वेबसाईट बनवली आहे. त्यामुळे अर्थातच ही वेबसाईट काही साध्य नाहिये, ती केवळ एक साधनच आहे…

आपलाच
ज्ञानेश्वर चंद्रकला गोरखनाथ जाधव